Monthly Archives: જુલાઇ, 2010

કિસ્મત મળે

Web Photo

એટલું, બસ એટલું  કિસ્મત મળે,
જેને ચાહું, એમની ચાહત મળે.

ક્યારનું ઝંખી રહ્યું છે બારણું,
કે હવે તો કોઈથી નિસ્બત મળે !

હું ભલે સાચું કહું, પણ તોય શું ?
તું મને કઈ વાતમાં સંમત મળે !

છે દયાને પાત્ર એવા માણસો,
જેની ઈચ્છાનું હરણ, આહત મળે.

કાશ ! એવી પણ વ્યવસ્થા ક્યાંક હો,
બાળપણ જ્યાં પૂર્ણત: અક્ષત મળે.

સુનીલ શાહ

(આહત– ઘાયલ, અક્ષત–સુરક્ષિત, અખંડ)

Advertisements

શી રીતે..?

(web photo)

હોય ના એ બતાવું શી રીતે ?
રોજ ઈશ્વરને લાવું શી રીતે..!

ઘેનમાં ડૂબ્યું લોક શ્રદ્ધાના,
ત્યાં હું શંકા ઉઠાવું શી રીતે ?

છે પ્રથમથી જ લક્ષ્ય નક્કી તો,
કોઈથી દોરવાવું શી રીતે ?

હોય કિસ્સા હજી અધૂરાં ત્યાં,
ક્હે, તને હું સમાવું શી રીતે ?

સાવ કાંટાળો માર્ગ છું, હું તો
કોઈ પગલાં વધાવું શી રીતે ?

(છંદવિધાન: ગાલગા ગાલગા લગાગાગા)

સુનીલ શાહ