Monthly Archives: ઓગસ્ટ, 2011

જીવા…

Web Photo

કાંટા વચ્ચે રહો છો, જીવા,
ફૂલો જેવું મહેકો, જીવા.

તોફાની છે દરિયો, જીવા
સંયમ થોડો રાખો, જીવા.

હા, દેહ ભલે શણગારો ને !
મનને સુંદર રાખો, જીવા.

રોશન કરવા જીવન સૌનું,
થઈએ જાતે તડકો, જીવા.

કોણ અહીં કાયમ રહેવાનું,
ખુદને બસ સમજાવો, જીવા

પાણી જેવું છે જીવન તો,
ફૂટે છે પરપોટો, જીવા.

ઓછું વત્તું તો હોવાનું,
છે જે, તે સ્વીકારો, જીવા.

પાંપણનો પહેરો ઓછો છે,
કે ચશ્માં પહેરો છો, જીવા..?

ભીતર હો કૈં જખ્મો તોયે,
નક્કર છાતી રાખો, જીવા.

સુનીલ શાહ

Advertisements

રોકી શકું

હો ચરણની છાપ તો ભૂંસી શકું,
હું સ્મરણનો માર્ગ ના રોકી શકું.

એટલી નવરાશ ક્યાં લાવી શકું ?
રોજ ઈશ્વર શોધવા નીકળી શકું..!

પટપટાવે આંખ સંમતિમાં તું જો,
મારું ખાલી પાત્ર છલકાવી શકું.

સાવ નાની વાતમા ઝઘડી પડું,
એટલો નીચે હું ના ઉતરી શકું,

એટલે મેં આયનો તોડ્યો હતો,
હમશકલની જાળથી છૂટી શકું.

વૃક્ષ છું હું, મારું સઘળું લઈ લે પણ,
માત્ર ટહુકો  ના તને આપી શકું.

સુનીલ શાહ