Web Photo

ફરી આ ડાળ પરના કૈંક ટહુકા સ્પર્શવા આવો,
વધારે કંઈ નહીં માગું, ભલે પાછા જવા આવો.

હજીયે જીવતું છે આશનું એક વૃક્ષ મારામાં,
તમે થઈ પાન લીલું, ડાળને શોભાવવા આવો.

નવાં દૃશ્યો, નવાં સપનાં, નવાં અર્થો, નવા સંદર્ભ,
ઉઘાડી દઉં, તમે જો સ્હેજ સાથે ચાલવા આવો.

કયા સંબંધથી આ ઓસને બહુ સાચવે છે ઘાસ,
બની સૂરજ, તમે એ રાઝ શાને જાણવા આવો ?

તમે મ્હોરી શકો, મ્હેકી શકો, ટહુકી શકો, જો તો જ–
ફિકર ના કાલની હો, એ ક્ષણોને જીવવા આવો.

સુનીલ શાહ