Monthly Archives: ઓગસ્ટ, 2013

તોય આવ્યા ?

લઈ યાદનો છાંયડો જેઓ જીવ્યા,
પૂછો, કેટલાં તડકા એણે સમાવ્યા ?

ગયા તોય, પાછા સવારે એ આવ્યા,
અમે દોસ્ત ! પડછાયા સામે ન ફાવ્યા.

તમે અર્થ તો એ જ કાઢ્યો, જે ફાવે,
અમે લાગણી બોળી શબ્દો સજાવ્યા.

જગતને કશી કિંમત જ ક્યાં છે એની,
તમે શિલ્પ આંસુનું લઈ, તોય આવ્યા..?

અજાણ્યો હવે એટલે લાગે છે દેહ,
તમે કૈંક ચહેરા હજીયે છુપાવ્યા.

હશે નમ્રતા તો સરળ થઈ જીવાશે,
અમે એ જ વાતે બધાને નમાવ્યા.

સુનીલ શાહ